(प्रहार Today वृत्तसेवा) जळगांव: सरकारी विद्युत कामांच्या प्रस्तावांमध्ये तडजोड करून, लाच मागून घेत असलेल्या विद्युत वितरण कंपनीच्या उपकार्यकारी अभियंता प्रशांत प्रभाकर इंगळे (वय ४६) याला जळगाव एसीबीने बुधवारी सायंकाळी पाच वाजेच्या सुमारास अटक केली. या प्रकरणामुळे लाचखोरीचा खळबळजनक प्रकार समोर आला आहे.
सूत्रांकडून मिळालेल्या माहितीनुसार, भुसावळ येथील ४९ वर्षीय शासकीय विद्युत ठेकेदार असलेले तक्रारदार यांच्याकडून इंगळे यांनी एका खाजगी कंपनीच्या एनएससी स्किम अंतर्गत नवीन सर्व्हिस कनेक्शनची क्षमतावाढ १०० वॅट वरून २०० वॅट करण्याच्या प्रस्तावावर मंजुरी मिळवण्यासाठी २५ हजार रुपयांची लाच मागितली होती. या मागणीच्या विरोधात तक्रारदारांनी जळगाव एसीबीकडे तक्रार केली, त्यानंतर एसीबीने तात्काळ पडताळणी करून कार्यवाही सुरु केली.
तडजोडअंती, इंगळे यांनी २० हजार रुपयांची लाच स्विकारण्यास सहमती दिली. यानंतर, २२ जानेवारी रोजी जळगाव शहरातील चोरवड कार्यालयात इंगळे यांना रंगेहाथ लाच स्विकारताना पकडण्यात आले. त्यानंतर त्यांना ताब्यात घेत अटक करण्यात आली.
या कारवाईसाठी जळगाव एसीबीच्या पथकाने कडक कार्यवाही केली. पोलीस अधिक्षक शर्मिष्ठा घारगे वालावलकर यांच्या मार्गदर्शनाखाली पोलीस उपअधीक्षक योगेश ठाकूर, पोलीस निरीक्षक स्मिता नवघरे, नाईक बाळू मराठे, आणि अमोल सूर्यवंशी यांचा समावेश असलेल्या पथकाने ही कारवाई केली. प्रशांत इंगळे यांच्याविरोधात भुसावळ तालुका पोलीस ठाण्यात गुन्हा दाखल करण्यात आला असून, याबाबत अधिक तपास सुरू करण्यात आला आहे.
